ਮੁੰਬਈ: ਟੀਵੀ ਸ਼ੋਅ ‘ਭਾਬੀ ਜੀ ਘਰ ਪਰ ਹੈਂ’ ਵਿੱਚ ਅੰਗੂਰੀ ਭਾਬੀ ਦਾ ਕਿਰਦਾਰ ਨਿਭਾਉਣ ਵਾਲੀ ਅਦਾਕਾਰਾ ਸ਼ੁਭਾਂਗੀ ਅਤਰੇ ਹੁਣ ਆਪਣੀ ਲਘੂ ਫਿਲਮ ‘ਵਾਂਟਡ ਐੱਮਆਰ ਕੋਹਲੀ’ ਵਿੱਚ ਕ੍ਰਿਕਟ ਪ੍ਰੇਮੀ ਦੀ ਭੂਮਿਕਾ ਨਿਭਾਅ ਰਹੀ ਹੈ। ਆਪਣੇ ਇਸ ਕਿਰਦਾਰ ਬਾਰੇ ਗੱਲ ਕਰਦਿਆਂ ਸ਼ੁਭਾਂਗੀ ਨੇ ਕਿਹਾ, ‘ਮੈਂ ਇਸ ਖੇਡ ਬਾਰੇ ਜ਼ਿਆਦਾ ਨਹੀਂ ਜਾਣਦੀ, ਪਰ ਹਾਂ ਮੈਂ ਕ੍ਰਿਕਟ ਬਾਰੇ ਖ਼ਬਰਾਂ ਜ਼ਰੂਰ ਪੜ੍ਹਦੀ ਰਹਿੰਦੀ ਹਾਂ ਤੇ ਇਸ ਤਰ੍ਹਾਂ ਮੈਂ ਖ਼ੁਦ ਨੂੰ ਕ੍ਰਿਕਟ ਬਾਰੇ ਅਪਡੇਟ ਰੱਖਦੀ ਹਾਂ। ਮੈਂ ਸਿਰਫ਼ ਵਿਸ਼ਵ ਕੱਪ ਦੌਰਾਨ ਹੀ ਕ੍ਰਿਕਟ ਮੈਚਾਂ ਦਾ ਆਨੰਦ ਮਾਣਦੀ ਹਾਂ। ਸਚਿਨ ਤੇਂਦੁਲਕਰ, ਮਹਿੰਦਰ ਸਿੰਘ ਧੋਨੀ ਅਤੇ ਵਿਰਾਟ ਕੋਹਲੀ ਮੇਰੇ ਪਸੰਦੀਦਾ ਖਿਡਾਰੀ ਹਨ। ਮੇਰੇ ਲਈ ਇਸ ਲਘੂ ਫਿਲਮ ਵਿੱਚ ਕੰਮ ਕਰਨ ਦਾ ਤਜਰਬਾ ਬਿਲਕੁਲ ਵੱਖਰਾ, ਨਵਾਂ ਤੇ ਖੁਸ਼ਗਵਾਰ ਸੀ। ਮੈਂ ਅਜਿਹਾ ਕੁਝ ਪਹਿਲਾਂ ਕਦੇ ਨਹੀਂ ਸੀ ਕੀਤਾ।’ ਸਚਿਨ ਗੁਪਤਾ ਵੱਲੋਂ ਤਿਆਰ ਇਸ ਦਸ ਮਿੰਟ ਦੀ ਲਘੂ ਫਿਲਮ ਵਿੱਚ ਸ਼ੁਭਾਂਗੀ ਅਤਰੇ ਤੋਂ ਇਲਾਵਾ ‘ਅਨਾਮਿਕਾ’ ਦੀ ਅਦਾਕਾਰਾ ਅਨੇਰੀ ਵਜਾਨੀ ਤੇ ਪ੍ਰਿਯੰਕਾ ਵੀ ਦਿਖਾਈ ਦੇਣਗੀਆਂ। -ਆਈਏਐੱਨਐੱਸ