ਵਿਨੀਪੈਗ (ਸੁਰਿੰਦਰ ਮਾਵੀ): ਇੱਥੋਂ ਦੇ ਮੈਪਲ ਕਮਿਊਨਿਟੀ ਸੈਂਟਰ ਵਿੱਚ ਵਿਨੀਪੈਗ ਕਬੱਡੀ ਐਸੋਸੀਏਸ਼ਨ ਵੱਲੋਂ ਕਰਵਾਇਆ ਗਿਆ ਕਬੱਡੀ ਟੂਰਨਾਮੈਂਟ ਰਿਚਮੰਡ ਤੇ ਐਬਸਫਰਡ ਸਪੋਰਟਸ ਕਲੱਬ ਦੇ ਨਾਮ ਰਿਹਾ। ਇਹ ਟੂਰਨਾਮੈਂਟ ਮਰਹੂਮ ਕਬੱਡੀ ਖਿਡਾਰੀ ਸੰਦੀਪ ਨੰਗਲਅੰਬੀਆਂ, ਗਾਇਕ ਸਿੱਧੂ ਮੂਸੇਵਾਲਾ ਅਤੇ ਦੀਪ ਸਿੱਧੂ ਨੂੰ ਸਮਰਪਿਤ ਸੀ। ਪ੍ਰਬੰਧਕਾਂ ਜਗਜੀਤ ਗਿੱਲ, ਯਾਦਵਿੰਦਰ ਦਿਓਲ, ਬੱਬੀ ਬਰਾੜ, ਹੈਪੀ ਸਿੱਧੂ ਤੇ ਸੁੱਖ ਸੰਧੂ ਨੇ ਦੱਸਿਆ ਕਿ ਇਸ ਟੂਰਨਾਮੈਂਟ ‘ਚ ਸ਼ਹੀਦ ਭਗਤ ਸਿੰਘ ਕੈਲਗਰੀ, ਰਿਚਮੰਡ ਤੇ ਐਬਸਫੋਰਡ ਕਬੱਡੀ ਕਲੱਬ, ਹਰਜੀਤ ਤਲਵਾਰ ਕਬੱਡੀ ਕਲੱਬ, ਸੰਦੀਪ ਗਲੈਡੀਏਟਰ ਕਬੱਡੀ ਕਲੱਬ ਵੈਨਕੂਵਰ, ਸਰੀ ਸੁਪਰ ਸਟਾਰ ਕਾਮਾਗਾਟਾਮਾਰੂ ਕਬੱਡੀ ਕਲੱਬ ਅਤੇ ਸ਼ੇਰ-ਏ-ਪੰਜਾਬ ਰਾਜਵੀਰ ਕਲੱਬ ਨੇ ਹਿੱਸਾ ਲਿਆ। ਇਸ ਦੌਰਾਨ ਸ਼ਹੀਦ ਭਗਤ ਸਿੰਘ ਸਪੋਰਟਸ ਕਬੱਡੀ ਕਲੱਬ ਨਾਲ ਹੋਏ ਫਾਈਨਲ ਮੁਕਾਬਲੇ ਵਿੱਚ ਰਿਚਮੰਡ ਤੇ ਐਬਸਫਰਡ ਕਬੱਡੀ ਕਲੱਬ ਜੇਤੂ ਰਿਹਾ। ਇਸ ਮੌਕੇ ਜੇਤੂ ਟੀਮ ਨੂੰ 15 ਹਜ਼ਾਰ ਡਾਲਰ ਅਤੇ ਦੂਜੇ ਸਥਾਨ ‘ਤੇ ਰਹਿਣ ਵਾਲੀ ਟੀਮ ਨੂੰ 9,100 ਡਾਲਰ ਦੇ ਨਕਦ ਇਨਾਮ ਨਾਲ ਸਨਮਾਨਿਆ ਗਿਆ।