ਧਰਮਪਾਲ
ਆਯੁਸ਼ੀ ਦੇ ਸਟਾਈਲਿੰਗ ਸੁਝਾਅ
ਅਭਿਨੇਤਰੀ ਆਯੁਸ਼ੀ ਖੁਰਾਣਾ ਸਟਾਰ ਭਾਰਤ ‘ਤੇ ਹਾਲ ਹੀ ਵਿੱਚ ਲਾਂਚ ਹੋਏ ਸ਼ੋਅ ‘ਅਜੂਨੀ’ ਨਾਲ ਆਪਣੇ ਪਹਿਲੇ ਮੁੱਖ ਕਿਰਦਾਰ ਨਾਲ ਟੈਲੀਵਿਜ਼ਨ ‘ਤੇ ਵਾਪਸ ਆਈ ਹੈ। ਉਸ ਦੀ ਅਭਿਨੇਤਾ ਸ਼ੋਏਬ ਇਬਰਾਹਿਮ (ਪਾਤਰ ਦਾ ਨਾਮ ਰਾਜਵੀਰ) ਨਾਲ ਜੋੜੀ ਬਣਾਈ ਗਈ ਹੈ। ਦਰਸ਼ਕ ਅਜੂਨੀ ਦੇ ਕਿਰਦਾਰ ਨੂੰ ਪਿਆਰ ਕਰ ਰਹੇ ਹਨ ਜੋ ਨਾ ਸਿਰਫ਼ ਸੁੰਦਰ ਹੈ, ਬਲਕਿ ਸ਼ੋਅ ਵਿੱਚ ਇੱਕ ਬਹਾਦਰ ਅਤੇ ਦਲੇਰ ਕੁੜੀ ਵੀ ਨਜ਼ਰ ਆ ਰਹੀ ਹੈ। ਆਪਣੇ ਆਪ ਨੂੰ ਇੱਕ ਅਭਿਨੇਤਰੀ ਦੇ ਤੌਰ ”ਤੇ ਸਾਬਤ ਕਰ ਚੁੱਕੀ ਆਯੁਸ਼ੀ ਇਸ ਤੋਂ ਪਹਿਲਾਂ ਸਟਾਈਲਿਸਟ ਰਹਿ ਚੁੱਕੀ ਹੈ। ਆਪਣੇ ਨਿੱਜੀ ਸਟਾਈਲ ਦੀ ਗੱਲ ਕਰਦੇ ਹੋਏ ਆਯੁਸ਼ੀ ਨੇ ਆਪਣੇ ਦਰਸ਼ਕਾਂ ਅਤੇ ਪ੍ਰਸ਼ੰਸਕਾਂ ਨਾਲ ਸਟਾਈਲ ਦੀਆਂ ਕਈ ਖਾਸ ਗੱਲਾਂ ਸਾਂਝੀਆਂ ਕੀਤੀਆਂ।
ਉਹ ਆਪਣੀ ਸੁੰਦਰਤਾ ਨੂੰ ਵਧਾਉਣ ਲਈ ਅਰਾਮਦੇਹ ਹੋਣ ਨੂੰ ਪਹਿਲਾ ਸਟਾਈਲਿੰਗ ਮੰਤਰ ਮੰਨਦੀ ਹੈ। ਉਹ ਕਹਿੰਦੀ ਹੈ, ”ਹਰ ਕੋਈ ਆਪਣੀ ਸਟਾਈਲਿੰਗ ਦੁਆਰਾ ਆਪਣੇ ਆਪ ਨੂੰ ਦੂਜਿਆਂ ਤੱਕ ਪਹੁੰਚਾਉਂਦਾ ਹੈ। ਇੱਕ ਅਭਿਨੇਤਰੀ ਬਣਨਾ ਹਮੇਸ਼ਾਂ ਮੇਰਾ ਸੁਪਨਾ ਰਿਹਾ ਹੈ ਅਤੇ ਸਟਾਈਲਿੰਗ ਸਿਰਫ਼ ਇੱਕ ਜਨੂੰਨ ਹੈ। ਜਿਸ ਨੂੰ ਮੈਂ ਕਰੀਅਰ ਵਜੋਂ ਵਿਕਸਤ ਕੀਤਾ ਹੈ। ਮੈਂ ਇੱਕ ਅਭਿਨੇਤਰੀ ਦੇ ਤੌਰ ‘ਤੇ ਸ਼ੁਰੂਆਤ ਨਹੀਂ ਕਰ ਸਕੀ, ਮੈਂ ਆਪਣੇ ਰੋਜ਼ਾਨਾ ਦੇ ਖਰਚੇ ਨੂੰ ਆਪਣੇ ਢੰਗ ਨਾਲ ਪੂਰਾ ਕਰਨਾ ਸ਼ੁਰੂ ਕਰ ਦਿੱਤਾ। ਜਦੋਂ ਮੈਂ ਕੁਝ ਪੈਸੇ ਇਕੱਠੇ ਕੀਤੇ ਤਾਂ ਮੈਂ ਆਪਣੇ ਟੀਚਿਆਂ ਨੂੰ ਪੂਰਾ ਕਰਨ ਲਈ ਮੁੰਬਈ ਆਈ।”
ਉਸ ਨੇ ਅੱਗੇ ਕਿਹਾ, ”ਰੇਹਾਨਾ ਮੇਰੀ ਫੈਸ਼ਨ ਆਦਰਸ਼ ਹੈ, ਮੈਂ ਉਸ ਨੂੰ ਖੁਦ ਨੂੰ ਸੰਭਾਲਣ ਤੇ ਪੇਸ਼ ਕਰਨ ਨੂੰ ਬਹੁਤ ਪਸੰਦ ਕਰਦੀ ਹਾਂ। ਮੈਂ ਹਮੇਸ਼ਾਂ ਉਸ ਨੂੰ ਆਪਣੇ ਫੈਸ਼ਨ ਦੀ ਪ੍ਰੇਰਣਾ ਵਜੋਂ ਦੇਖਦੀ ਹਾਂ ਕਿਉਂਕਿ ਉਹ ਕਿਸੇ ਵੀ ਪਹਿਰਾਵੇ ਵਿੱਚ ਚੰਗੀ ਲੱਗ ਸਕਦੀ ਹੈ, ਪਰ ਜਦੋਂ ਮੈਂ ਆਪਣੇ ਆਪ ਨੂੰ ਸਟਾਈਲ ਕਰਦੀ ਹਾਂ ਤਾਂ ਆਰਾਮਦਾਇਕ ਹੋਣਾ ਮੇਰੀ ਸਭ ਤੋਂ ਵੱਡੀ ਤਰਜੀਹ ਹੈ। ਮੈਂ ਅਕਸਰ ਚੀਜ਼ਾਂ ਨੂੰ ਬਹੁਤ ਹੀ ਸਾਧਾਰਨ ਅਤੇ ਸਟਾਈਲਿਸ਼ ਰੱਖਣ ਦੀ ਕੋਸ਼ਿਸ਼ ਕਰਦੀ ਹਾਂ। ਮੇਰੇ ਫੈਸ਼ਨ ਦੇ ਕੁਝ ਨਿਯਮ ਹਨ ਜਿਨ੍ਹਾਂ ਦੀ ਮੈਂ ਪਾਲਣਾ ਕਰਦੀ ਹਾਂ ਅਤੇ ਮੈਂ ਆਪਣੇ ਦਰਸ਼ਕਾਂ ਨੂੰ ਸਲਾਹ ਦੇਵਾਂਗੀ ਕਿ ਘੱਟ ਖਰੀਦੋ, ਮਿਕਸ ਅਤੇ ਮੈਚ ਕਰੋ। ਇਸ ਲਈ ਕੋਸ਼ਿਸ਼ ਕਰੋ ਕਿ ਜਦੋਂ ਕੱਪੜੇ ਪਹਿਨੋ ਤਾਂ ਉਹ ਆਪਣੇ ਲਈ ਪਹਿਨੋ ਨਾ ਕਿ ਕਿਸੇ ਹੋਰ ਲਈ।”
ਸਿਮਸਿਮ ਦੀ ਸ਼ਾਨਦਾਰ ਦਿੱਖ
ਸੋਨੀ ਸਬ ਨੇ ਦੋ ਮਹੀਨੇ ਪਹਿਲਾਂ ਪਰਿਵਾਰਕ ਮਨੋਰੰਜਨ ਸ਼ੋਅ ‘ਅਲੀਬਾਬਾ ਦਾਸਤਾਨ-ਏ-ਕਾਬੁਲ’ ਲਾਂਚ ਕੀਤਾ ਸੀ। ਦਰਸ਼ਕ ਇਸ ਦੀ ਮਨਮੋਹਕ ਕਹਾਣੀ ਅਤੇ ਸ਼ਾਨਦਾਰ ਕਾਸਟ ਲਈ ਸ਼ੋਅ ਨੂੰ ਪਿਆਰ ਕਰ ਰਹੇ ਹਨ। ਹਾਲਾਂਕਿ, ਪ੍ਰਸ਼ੰਸਾ ਦੇ ਦੌਰ ਇੱਥੇ ਖਤਮ ਨਹੀਂ ਹੁੰਦੇ. ਪ੍ਰਸ਼ੰਸਕ ਸ਼ੋਅ ਦੇ ਪਹਿਰਾਵੇ ਨੂੰ ਪਿਆਰ ਕਰ ਰਹੇ ਹਨ ਜੋ ਹਰ ਕਿਰਦਾਰ ਨਾਲ ਮੇਲ ਖਾਂਦੇ ਹਨ।
ਸਮੁੱਚੇ ਰੂਪ ਵਿੱਚ ਜੇਕਰ ਪਹਿਰਾਵੇ ਅਤੇ ਮੇਕਅੱਪ ਦੀ ਗੱਲ ਕਰੀਏ ਤਾਂ ਇਸ ਸ਼ੋਅ ਵਿੱਚ ਸਿਮਸਿਮ ਉਰਫ਼ ਸਯੰਤਨੀ ਘੋਸ਼ ਦੀ ਦਿੱਖ ਦੀ ਕਾਫ਼ੀ ਤਾਰੀਫ਼ ਹੋ ਰਹੀ ਹੈ। ਉਸ ਦੀ ਦਿੱਖ ਵਿੱਚ ਨੀਲੇ ਹਾਈਲਾਈਟ ਕੀਤੇ ਵਾਲ, ਨੀਲੀਆਂ ਅੱਖਾਂ ਅਤੇ ਇੱਕ ਲੰਬਾ ਸੁੰਦਰ ਨੀਲਾ ਪਹਿਰਾਵਾ ਸ਼ਾਮਲ ਹੈ। ਇੱਕ ਵਿਸ਼ੇਸ਼ ਗੱਲਬਾਤ ਵਿੱਚ, ਟੈਲੀਵਿਜ਼ਨ ਦੀ ਸਿਮਸਿਮ ਯਾਨੀ ਸਯੰਤਨੀ ਘੋਸ਼ ਨੇ ਆਪਣੀ ਦਿੱਖ ਅਤੇ ਇਸ ਦੀ ਮਹੱਤਤਾ ਬਾਰੇ ਬੇਬਾਕੀ ਨਾਲ ਗੱਲ ਕੀਤੀ।
ਸਿਮਸਿਮ ਦੀ ਦਿੱਖ ਕਿਵੇਂ ਸ਼ੁਰੂ ਹੋਈ ਇਸ ਬਾਰੇ ਵਿਸਥਾਰ ਵਿੱਚ ਸਯੰਤਨੀ ਨੇ ਕਿਹਾ, “ਸਾਡੀ ਰਚਨਾਤਮਕ ਟੀਮ ਅਤੇ ਸਟਾਈਲਿਸਟ ਨੇ ਫੈਸਲਾ ਕੀਤਾ ਸੀ ਕਿ ਸ਼ੋਅ ਵਿੱਚ ਸਿਮਸਿਮ ਦੀ ਦਿੱਖ ਨੂੰ ਇੱਕ ਕਲਰ ਥੀਮ ਦਿੱਤਾ ਜਾਣਾ ਚਾਹੀਦਾ ਹੈ। ਸਿਮਸਿਮ ਗੁਫਾ ਦੀ ਰਾਣੀ ਹੈ ਅਤੇ ਇਸ ਨੂੰ ਹਨੇਰੇ ਅਤੇ ਠੰਢੇ ਸਥਾਨ ਵਿੱਚ ਰੱਖਦੀ ਹੈ। ਉਹ ਇਬਲਿਸ ਨਾਲ ਗਹਿਰੇ ਪਿਆਰ ਵਿੱਚ ਹੈ ਅਤੇ ਉਸ ਨੂੰ ਦੁਬਾਰਾ ਜੀਵਨ ਵਿੱਚ ਲਿਆਉਣ ਦੀ ਪੂਰੀ ਕੋਸ਼ਿਸ਼ ਕਰ ਰਹੀ ਹੈ। ਕਿਉਂਕਿ, ਸਿਮਸਿਮ ਦੀ ਦੁਨੀਆ ਬਹੁਤ ਠੰਢੀ ਅਤੇ ਹਨੇਰੀ ਭਰਪੂਰ ਹੈ। ਇਸੇ ਲਈ ਉਸ ਦੀ ਦਿੱਖ ਵਿੱਚ ਨੀਲੇ, ਗੂੜ੍ਹੇ ਨੀਲੇ ਅਤੇ ਸਿਲਵਰ ਵਰਗੇ ਰੰਗਾਂ ਦੀ ਵਰਤੋਂ ਕੀਤੀ ਗਈ ਹੈ। ਉਸ ਦਾ ਸਾਥੀ ਇਬਲਿਸ ਅਜੇ ਵੀ ਲਾਸ਼ ਹੈ ਅਤੇ ਉਸ ਦੇ ਕੱਪੜੇ ਵੀ ਕਾਲੇ ਹਨ, ਇਸ ਲਈ ਅਸੀਂ ਸੋਨੇ ਨਾਲੋਂ ਚਾਂਦੀ ਦੇ ਗਹਿਣੇ ਜ਼ਿਆਦਾ ਵਰਤੇ ਹਨ। ਅਸੀਂ ਸਿਮਸਿਮ ਦੀ ਗੁਫਾ ਵਿੱਚ ਬਰਫ਼ਬਾਰੀ ਵੀ ਦੇਖੀ ਹੈ ਅਤੇ ਇਸ ਲਈ ਉਸ ਦੀ ਦਿੱਖ ਵਿਚ ਚਿੱਟੇ, ਚਾਂਦੀ ਅਤੇ ਨੀਲੇ ਰੰਗਾਂ ਦਾ ਸੁਮੇਲ ਨਜ਼ਰ ਆਉਂਦਾ ਹੈ।”
ਸਯੰਤਨੀ ਨੇ ਅੱਗੇ ਕਿਹਾ, “ਸਿਮਸਿਮ ਬਹੁਤ ਤਰਲ ਹੈ ਅਤੇ ਜ਼ਿਆਦਾਤਰ ਹਵਾ ਵਿੱਚ ਉੱਡਦੀ ਹੈ। ਇੱਥੋਂ ਤੱਕ ਕਿ ਗ੍ਰਾਫਿਕਸ ਵਿੱਚ ਵੀ, ਅਸੀਂ ਉਸ ਦੇ ਜਾਦੂ ਦੇ ਦੌਰਾਨ ਜਾਂ ਜਦੋਂ ਉਹ ਉੱਡਦੀ ਹੈ ਤਾਂ ਪਾਣੀ ਵਰਗੀ ਚੀਜ਼ ਉੱਭਰਦੀ ਵੇਖੀ ਹੈ। ਇਸ ਲਈ ਨੀਲਾ ਰੰਗ ਉਸ ਤਰਲਤਾ ਨੂੰ ਦਿਖਾਉਣ ਲਈ ਬਹੁਤ ਵਧੀਆ ਕੰਮ ਕਰਦਾ ਹੈ।”
ਆਪਣੇ ਐਕਸੈਸਰੀਜ਼ ਬਾਰੇ ਗੱਲ ਕਰਦੇ ਹੋਏ, ਉਸ ਨੇ ਕਿਹਾ, “ਸਿਮਸਿਮ ਦੀ ਸਭ ਤੋਂ ਮਹੱਤਵਪੂਰਨ ਚੀਜ਼ ਉਸ ਦਾ ‘ਤਾਜ’ ਹੈ। ਉਸ ਦੀ ਦਿੱਖ ਤਾਜ ਅਤੇ ਨਹੁੰਆਂ ਤੋਂ ਬਿਨਾਂ ਅਧੂਰੀ ਹੈ, ਜਿਸ ਨੂੰ ਮੈਂ ਆਈਸ-ਕ੍ਰੀਮ ਕੋਨ ਕਹਿੰਦੀ ਹਾਂ। ਅਸੀਂ ਭਾਰਤੀ ਟੈਲੀਵਿਜ਼ਨ ‘ਤੇ ਦੇਖਿਆ ਹੈ ਕਿ ਜਦੋਂ ਵੀ ਕੋਈ ਕਾਸਟਿਊਮ ਡਰਾਮਾ ਦਿਖਾਇਆ ਜਾਂਦਾ ਹੈ, ਤਾਂ ਇਸ ਦੇ ਪਾਤਰ ਕੱਪੜਿਆਂ ਅਤੇ ਗਹਿਣਿਆਂ ਨਾਲ ਭਰੇ ਹੁੰਦੇ ਹਨ। ਸਿਮਸਿਮ ਦੀ ਦਿੱਖ ਦੀ ਸਭ ਤੋਂ ਅਨੋਖੀ ਗੱਲ ਇਹ ਹੈ ਕਿ ਨਿਰਮਾਤਾਵਾਂ ਨੇ ਸਿਰਫ਼ ਦੋ ਉਪਕਰਨਾਂ ਨਾਲ ਇਸ ਦੀ ਦਿੱਖ ਨੂੰ ਥੋੜ੍ਹਾ ਪੱਛਮੀ ਰੱਖਣ ਦੀ ਕੋਸ਼ਿਸ਼ ਕੀਤੀ ਹੈ। ਤਾਜ ਅਤੇ ਨਹੁੰਆਂ ਤੋਂ ਇਲਾਵਾ, ਮੇਰੀ ਗਰਦਨ ਅਤੇ ਕੰਨ ਪੂਰੀ ਤਰ੍ਹਾਂ ਖਾਲੀ ਹਨ ਅਤੇ ਨੀਲੇ ਸੂਖਮ ਮੇਕਅਪ ਨਾਲ ਦਿੱਖ ਨੂੰ ਪੂਰਾ ਕੀਤਾ ਗਿਆ ਹੈ।”
ਸਯੰਤਨੀ ਘੋਸ਼ ਨੇ ਅੱਗੇ ਕਿਹਾ, “ਜਦੋਂ ਮੈਂ ਸ਼ੁਰੂ ਵਿੱਚ ਸ਼ੂਟਿੰਗ ਸ਼ੁਰੂ ਕੀਤੀ ਸੀ, ਅਸੀਂ ਨਹੀਂ ਸੋਚਿਆ ਸੀ ਕਿ ਸਕ੍ਰੀਨ ‘ਤੇ ਇਹ ਦਿਖ ਇੰਨੀ ਵਧੀਆ ਦਿਖਾਈ ਦੇਵੇਗੀ। ਪਰ ਜਦੋਂ ਅਸੀਂ ਪਹਿਲਾ ਐਪੀਸੋਡ ਦੇਖਿਆ, ਤਾਂ ਸਮੁੱਚੀ ਦਿੱਖ ਨੇ ਅਸਲ ਵਿੱਚ ਸਿਮਸਿਮ ਦੇ ਕਿਰਦਾਰ ਨੂੰ ਵਿਲੱਖਣਤਾ ਪ੍ਰਦਾਨ ਕੀਤੀ।” ਸਾਰਾ ਦਿਨ ਹਾਰਨੈੱਸ ‘ਤੇ ਰਹਿਣ ਅਤੇ ਮੇਕਅਪ ਅਤੇ ਪਹਿਰਾਵੇ ਲਈ 2 ਘੰਟੇ ਦੇਣ ਤੋਂ ਇਲਾਵਾ, ਕਈ ਵਾਰ ਅਜਿਹਾ ਵੀ ਹੁੰਦਾ ਹੈ ਜਦੋਂ ਸਯੰਤਾਨੀ ਨੂੰ ਸਿਮਸਿਮ ਦੀ ਗੁਫਾ ਵਿੱਚ ਬਿਨਾਂ ਕਿਸੇ ਸਹਿ-ਅਦਾਕਾਰ ਦੇ ਘੰਟਿਆਂਬੱਧੀ ਸ਼ੂਟਿੰਗ ਕਰਨੀ ਪੈਂਦੀ ਹੈ, ਜਿਸ ਨਾਲ ਇਕੱਲਤਾ ਮਹਿਸੂਸ ਹੁੰਦੀ ਹੈ। ਹਾਲਾਂਕਿ, ਸਯੰਤਾਨੀ ਲਈ, ਇਹ ਸਾਰੀਆਂ ਭਾਵਨਾਤਮਕ ਅਤੇ ਸਰੀਰਕ ਚੁਣੌਤੀਆਂ ਉਦੋਂ ਪੂਰੀਆਂ ਹੁੰਦੀਆਂ ਹਨ ਜਦੋਂ ਪੂਰਾ ਅਮਲਾ ਇੱਕ ਸ਼ਾਨਦਾਰ ਕੰਮ ਕਰਦਾ ਹੈ।
ਪਰਿਣੀਤੀ ਨੇ ਸਾਂਝੇ ਕੀ਼ਤੇ ਤਜਰਬੇ
ਸੋਨੀ ਐਂਟਰਟੇਨਮੈਂਟ ਟੈਲੀਵਿਜ਼ਨ ਦੇ ਸ਼ੋਅ ‘ਦਿ ਕਪਿਲ ਸ਼ਰਮਾ ਸ਼ੋਅ’ ਵਿੱਚ ਅੱਜ ਫਿਲਮ ‘ਕੋਡ ਨੇਮ ਤਿਰੰਗਾ’ ਦੀ ਪੂਰੀ ਸਟਾਰ ਕਾਸਟ ਆਏਗੀ ਜਿਸ ਵਿੱਚ ਪਰਿਣੀਤੀ ਚੋਪੜਾ, ਹਾਰਡੀ ਸੰਧੂ, ਸ਼ਰਦ ਕੇਲਕਰ, ਰਜਿਤ ਕਪੂਰ ਅਤੇ ਨਿਰਦੇਸ਼ਕ ਰਿਭੂ ਦਾਸਗੁਪਤਾ ਸ਼ਾਮਲ ਹਨ।
ਹਾਸੇ ਅਤੇ ਗੱਪਸ਼ੱਪ ਦੇ ਵਿਚਕਾਰ ਸ਼ੋਅ ਦੇ ਮੇਜ਼ਬਾਨ ਕਪਿਲ ਸ਼ਰਮਾ ਨੇ ਪਰਿਣੀਤੀ ਨੂੰ ਰੋਮਾਂਟਿਕ ਕਾਮੇਡੀ ਤੋਂ ‘ਕੋਡ ਨੇਮ ਤਿਰੰਗਾ’ ਵਰਗੀਆਂ ਐਕਸ਼ਨ ਫਿਲਮਾਂ ਵੱਲ ਜਾਣ ਦਾ ਕਾਰਨ ਪੁੱਛਿਆ ਜਿਸ ‘ਤੇ ਪਰਿਣੀਤੀ ਚੋਪੜਾ ਨੇ ਕਿਹਾ, ”ਹਰ ਕੋਈ ਕਹਿੰਦਾ ਸੀ ਕਿ ਮੈਂ ਬਹੁਤ ਪਿਆਰੀ ਤੇ ਚੁਲਬੁਲੀ ਹਾਂ। ਮੈਂ ਇਹ ਸੁਣ ਕੇ ਥੱਕ ਗਈ ਸੀ। ਇਸ ਲਈ ਜਦੋਂ ਨਿਰਦੇਸ਼ਕ ਨੇ ਮੈਨੂੰ ਇਸ ਐਕਸ਼ਨ ਫਿਲਮ ਦੀ ਪੇਸ਼ਕਸ਼ ਕੀਤੀ ਤਾਂ ਮੈਂ ਬਿਲਕੁਲ ਨਹੀਂ ਸੋਚਿਆ ਅਤੇ ਕਿਹਾ ਕਿ ਮੈਂ ਐਕਸ਼ਨ ਹੀਰੋਇਨ ਬਣਨਾ ਚਾਹੁੰਦੀ ਹਾਂ। ਮੈਂ ਇੰਡਸਟਰੀ ਵਿੱਚ 10 ਸਾਲਾਂ ਤੋਂ ਹਾਂ ਅਤੇ ਮੈਂ ਸੱਚਮੁੱਚ ਕੁਝ ਹਟਕੇ ਕਰਨਾ ਚਾਹੁੰਦੀ ਸੀ।”
ਚਰਚਾ ਨੂੰ ਹੋਰ ਦਿਲਚਸਪ ਬਣਾਉਂਦੇ ਹੋਏ, ਪਰਿਣੀਤੀ ਨੇ ਤੁਰਕੀ ਵਿੱਚ ਸ਼ੂਟਿੰਗ ਦਾ ਆਪਣਾ ਅਨੁਭਵ ਸਾਂਝਾ ਕੀਤਾ। ਉਸ ਨੇ ਕਿਹਾ, ”ਇੱਕ ਸੀਨ ਸੀ, ਜੋ ਕਿ ਕਿਸ਼ਤੀ ‘ਤੇ ਸ਼ੂਟ ਕੀਤਾ ਗਿਆ ਸੀ। ਸ਼ੂਟ ਦੌਰਾਨ ਤਾਪਮਾਨ -10 ਤੋਂ -11 ਡਿਗਰੀ ਦੇ ਆਸ-ਪਾਸ ਸੀ ਅਤੇ ਪੂਰੀ ਯੂਨਿਟ ਜੈਕੇਟ, ਮਫਲਰ ਅਤੇ ਮਾਸਕ ਨਾਲ ਪੂਰੀ ਤਰ੍ਹਾਂ ਢੱਕੀ ਹੋਈ ਸੀ, ਜਦੋਂ ਕਿ ਮੈਂ ਇੱਕ ਅੱਧੀਆਂ ਬਾਹਾਂ ਦੀ ਟੀ-ਸ਼ਰਟ ਪਹਿਨੀ ਹੋਈ ਸੀ। ਕੋਈ ਨਹੀਂ ਜਾਣਦਾ ਸੀ ਕਿ ਮੇਰੇ ਪੈਰਾਂ ‘ਤੇ ਕਿੰਨੇ ਕੰਬਲ ਸਨ ਕਿਉਂਕਿ ਅਸੀਂ ਕਿਸ਼ਤੀ ‘ਤੇ ਸੀ ਅਤੇ ਹਵਾ ਚੱਲ ਰਹੀ ਸੀ। ਇਹ ਮੇਰਾ ਐਂਟਰੀ ਸੀਨ ਸੀ। ਨਿਰਦੇਸ਼ਕ ਰਿਭੂ ਸਰ ਨੇ ਕਿਹਾ ਕਿ ਹੀਰੋ ਦੀ ਤਰ੍ਹਾਂ ਖੜ੍ਹੇ ਹੋ ਕੇ ਪ੍ਰਵੇਸ਼ ਕਰੋ, ਪਰ ਮੈਂ ਕਿਹਾ ਕਿ ਮੈਂ ਹੀਰੋਇਨ ਦੀ ਤਰ੍ਹਾਂ ਐਂਟਰੀ ਕਰਾਂਗੀ। ਬਾਅਦ ਵਿੱਚ ਜਦੋਂ ਹਾਰਡੀ ਉੱਥੇ ਆਇਆ ਤਾਂ ਮੈਂ ਉਸ ਨੂੰ ਇੱਕ ਜੈਕੇਟ ਅਤੇ ਹੀਟ ਪੈਚ ਲਿਆਉਣ ਲਈ ਕਿਹਾ। ਫਿਰ ਸਾਡਾ ਸਬੰਧ ਹੋਰ ਮਜ਼ਬੂਤ ਹੋਇਆ। ਇਸ ਤਰ੍ਹਾਂ ਅਸੀਂ ਸ਼ੂਟਿੰਗ ਦੌਰਾਨ ਬਹੁਤ ਕਰੀਬੀ ਦੋਸਤ ਬਣ ਗਏ।”