ਮੁੰਬਈ: ਸੁਪਰਸਟਾਰ ਅਮਿਤਾਭ ਬੱਚਨ ਨੇ ਆਵਾਜਾਈ ਜਾਮ ਵਿੱਚੋਂ ਨਿਕਲਣ ਅਤੇ ਸ਼ੂਟਿੰਗ ‘ਤੇ ਸਮੇਂ ਸਿਰ ਪਹੁੰਚਾਉਣ ਵਾਲੇ ਇੱਕ ਅਣਜਾਣ ਵਿਅਕਤੀ ਦਾ ਧੰਨਵਾਦ ਕੀਤਾ ਹੈ। ਅਮਿਤਾਭ (80) ਨੇ ਇੰਸਟਾਗ੍ਰਾਮ ‘ਤੇ ਮੋਟਰਸਾਈਕਲ ਚਾਲਕ ਨਾਲ ਐਤਵਾਰ ਰਾਤ ਨੂੰ ਇੱਕ ਤਸਵੀਰ ਸਾਂਝੀ ਕੀਤੀ ਹੈ। ਉਸ ਨੇ ਇਸ ਤਸਵੀਰ ਨਾਲ ਲਿਖਿਆ, ”ਮੈਨੂੰ ਮੋਟਰਸਾਈਕਲ ‘ਤੇ ਬਿਠਾਉਣ ਲਈ ਮਿਹਰਬਾਨੀ ਦੋਸਤ, ਤੁਹਾਨੂੰ ਨਹੀਂ ਪਤਾ ਪਰ ਤੁਹਾਡੀ ਵਜ੍ਹਾ ਕਰ ਕੇ ਮੈਂ ਸ਼ੂਟਿੰਗ ‘ਤੇ ਸਮੇਂ ਸਿਰ ਪੁੱਜ ਸਕਿਆ। ਜਾਮ ਤੋਂ ਬਚਾਉਣ ਲਈ ਧੰਨਵਾਦ।” ਇਸ ਤਸਵੀਰ ਵਿੱਚ ਅਮਿਤਾਭ ਇੱਕ ਮੋਟਰਸਾਈਕਲ ਦੇ ਪਿੱਛੇ ਬੈਠੇ ਨਜ਼ਰ ਆ ਰਹੇ ਹਨ। ਫਿਲਮ ਸਨਅਤ ਦੇ ਕਈ ਲੋਕਾਂ ਨੇ ਅਮਿਤਾਭ ਦੀ ਮੋਟਰਸਾਈਕਲ ਚਾਲਕ ਨਾਲ ਬੈਠ ਕੇ ਜਾਣ ਦੀ ਸ਼ਲਾਘਾ ਕੀਤੀ ਹੈ। ਦੂਜੇ ਪਾਸੇ, ਕੁਝ ਲੋਕਾਂ ਨੇ ਸੋਸ਼ਲ ਮੀਡੀਆ ‘ਤੇ ਇਹ ਸਵਾਲ ਖੜ੍ਹਾ ਕੀਤਾ ਕਿ ਮੋਟਰਸਾਈਕਲ ਚਾਲਕ ਅਤੇ ਅਮਿਤਾਭ ਬੱਚਨ, ਦੋਵਾਂ ਨੇ ਹੈਲਮੇਟ ਕਿਉਂ ਨਹੀਂ ਪਾਇਆ। ਇਕ ਵਿਅਕਤੀ ਨੇ ਲਿਖਿਆ ਹੈ,”ਹੈਲਮੇਟ ਕਿੱਥੇ ਹੈ ਸਰ।” ਅਮਿਤਾਭ ਬੱਚਨ ਇਨ੍ਹੀਂ ਦਿਨੀਂ ਫਿਲਮ ‘ਸੈਕਸ਼ਨ-84’ ਦੀ ਸ਼ੂਟਿੰਗ ਵਿੱਚ ਰੁੱਝੇ ਹੋਏ ਹਨ। ਇਸ ਫਿਲਮ ਦਾ ਨਿਰਦੇਸ਼ਨ ਰਿਭੂ ਦਾਸਗੁਪਤਾ ਕਰ ਰਹੇ ਹਨ। -ਪੀਟੀਆਈ